Post

شقة ملك، ولا عمارة شرك - الشراكه

شقة ملك، ولا عمارة شرك.

وغيرها من الأمثال اللي بترفض الشراكة شكلاً وموضوعاً، الشراكة الناجحة تعتبر من أكتر الحاجات اللي تخلي البشر يكبروا شغلهم ويبنوا مشاريع كبيرة.

قبل ماتلوم الشراكة كمبدأ، لازم تأخد بالأسباب وتحدد هل أنت شريك مناسب؟ هل شغلك محتاج شريك؟

أي مشروع بيحتاج ٤ حاجات:
١- فلوس
٢- مجهود
٣- خبرة
٤- علاقات

وبنفس الترتيب دة في الأهمية.

كل شريك محتاج يقدم علي الأقل ٣ حاجات من ال٤ دول، ولازم الشركاء يكملوا بعض، يعني ميكنش حضرتك مش فاضي تدي مجهودك في المشروع وتروح تشارك واحد مش فاضي برضوا، ولا يكون معندكش خبرة، وتروح تشارك حد معندوش خبرة.

قبل ماتفاتح حد في موضوع الشراكة، حدد انت هتقدر تقدم اية للمشروع بتاعك؟ واية الحاجات اللي ناقصاك؟

١- بدل ماتشارك حد عشان محتاج فلوس، فانت ممكن تستلف، او تعتمد علي علاقاتك بالمورديين عشان تاخد بضاعة آجل.
٢- بدل ماتشارك حد عشان يقف معاك في المحل، ممكن تعين موظف.
٣- بدل ماتشارك حد عشان خبرته، ممكن تعينه كموظف وتديه نسبة من الربح علي شرط وجودك دايما عشان تتعلم الشغل مع الوقت.
٤- لو في علاقات انت محتاجها بمورديين او عملاء ممكن تعوضها بوسطاء او مسوقيين يساعدوك، وياخدوا هامش ربح، او ممكن تستخدم سوق الجملة عشان تتعرف علي مورديين جداد.

طيب لو أنت معاك ٣ حاجات، ولقيت شريك معاه ٣ حاجات، وانتوا الاتنين بتكملوا بعض.

أكتر حاجة ممكن تعمل خلاف بينكم، هو التوقعات، مثلا انت شاركت حد ومتوقع انه يسيب شغله ويتفرغ للمشروع وهو معملش كدة. ساعتها أنت بتيجي علي نفسك وتسكت وأنت متضرر، وهو هيكون مستغرب انت لية بتعامله وحش!

لتفادي الخلافات، لازم انتوا الاتنين تتكلموا بصراحة ووضوح، وتحددوا انتوا لية بتشاركوا بعض، واية اللي محتاجينه من بعض. ولازم برضوا تتفقوا علي طريقة فض الشراكة عشان متخسروش علاقات انسانية بسبب الشغل.

يعني الفلوس اشتريتوا بيها بضاعة، واختلفتم، طب مين هياخد فلوس ومين هياخد بضاعة، طب الفلوس اللي ليكم عند الناس هتقسموها ازاي؟ اتفقوا علي كل اللي يخطر في بالكم في حالة فض الشراكة.

انجح الشراكات هي اللي قائمة علي العدل والمصلحة، فبلاش تضحك علي شريكك وقت الاتفاق، ولا تقبل لنفسك انك تضحي، وبلاش تشارك ابن خالتك عشان ياعيني مش لاقي شغل. فكر في مصلحتك دلوقت وقدام عشان الشراكة تنجح.